ပြန်ပေး
ရေနံသိုက်တွေ
သဘာ၀ဓာတ်ငွေ့တွေ
ကျောက်မီးသွေးတွေ
မလိုချင်ဘူး
အန္တာတိက ပြန်ပေး။
ကား၊ ရထားတွေ
လေယာဉ်ပျံတွေ
သင်္ဘောတွေ
မလိုချင်ဘူး
မြက်ခင်းစိမ်းတွေ ပြန်ပေး။
ဘော်ဒီစပရေးတွေ
အင်းဆက်ကေလာတွေ
ဂက်စ်မီးခြစ်တွေ
မလိုချင်ဘူး
အိုဇုန်းလွှာ ပြန်ပေး။
စာရေးစားပွဲတွေ
ကုလားထိုင်တွေ
ပရိဘောဂတွေ
မလိုချင်ဘူး
အမြဲစိမ်းသစ်တောတွေ ပြန်ပေး။
ကာဗွန်ဒိုင်အောက်ဆိုက်တွေ
ဖော်စီမြူရယ်တွေ
ဖန်လုံအိမ်အာနိသင်တွေ
မလိုချင်ဘူး
သန္တာကျောက်တန်းတွေ ပြန်ပေး။
နျူကလီးယားဓာတ်ပေါင်းဖိုတွေ
ယူရေနီယံသန့်စင်စက်တွေ
ဂျင်နရေတာတွေ
မလိုချင်ဘူး
လသာညတွေ ပြန်ပေး။
အပန်းဖြေစခန်းတွေ
ကမ်းခြေဟိုတယ်တွေ
အဆင့်မြင့်အိမ်ယာတွေ
မလိုချင်ဘူး
ဒီရေတောတွေ ပြန်ပေး။
ယုန်မွှေးဆွယ်တာတွေ
မိချောင်း သားရေအိတ်တွေ
ကျားသစ်အင်္ကျီတွေ
မလိုချင်ဘူး
အမေဇုန် ပြန်ပေး။
ကြွပ်ကြွပ်အိတ်တွေ
စက်ရုံမီးခိုးတွေ
အဆိပ်သင့်စွန့်ပစ်ပစ္စည်းတွေ
မလိုချင်ဘူး
ကောင်းကင်ပြာပြာပြန်ပေး။
ပြန်ပေး… ပြန်ပေး
အခုချင်ချင်း ပြန်ပေး
ဘုရားသခင်ရဲ့ လက်ရာတော်အတိုင်း
သဘာ၀တရားတွေ အကုန်ပြန်ပေး။ ။
-ယမုံ-
အောင်ပင်လယ်လူမှုဝန်းကျင်မဂ္ဂဇင်း၊ နိုဝင်ဘာ ၂၀၀၉။
No Comments