ဘင်္ဂလားပင်လယ်အော်တွင် မုန်တိုင်းဖြစ်လာနိုင်သည့် စောင့်ကြည့်ရမည့်လေဖိအားနည်းရပ်ဝန်း INVEST-99W ထိုင်းပင်လယ်ကွေ့တွင် စတင်ဖြစ်ပေါ်

INVEST-99W စတင်ဖြစ်ပေါ်သည့်အခြေအနေ

ဘရူနိုင်းနိုင်ငံ ဘန်ဒါဆရီဘာဂါဝန်မြို့အနောက်ဘက် ထိုင်းပင်လယ်ကွေ့မှာ စတင်ဖြစ်ပေါ်ပြီး အနောက်ဘက်ကို ဆက်လက်ရွေ့လျားနိုင်ကြောင်း၊ ကပ္ပလီပင်လယ်တောင်ပိုင်းကို နိုဝင်ဘာလ ၂၇ ရက်နဲ့ ဘင်္ဂလားပင်လယ်အော်အရှေ့တောင်ပိုင်းကို နိုဝင်ဘာလ ၂၈ ရက်နေ့တွေမှာ ရွေ့လျားဝင်ရောက်လာပြီး လေတိုက်နှုန်း တနာရီ မိုင် ၄၀ အထိ ရှိလာနိုင်ကာ မုန်တိုင်းငယ်ဖြစ်လာနိုင်ကြောင်း ကြိုတင်ခန့်မှန်းချက်တွေမှာ တွေ့ရပါတယ်။

မြန်မာနိုင်ငံအပေါ်သက်ရောက်နိုင်မဲ့ မိုးလေဝသအခြေအနေများ

ပင်လယ်ပြင်အခြေအနေ

မွန်-တနင်္သာရီကမ်းရိုးတန်းတလျှောက်နဲ့ မြစ်ဝကျွန်းပေါ်ကမ်းရိုးတန်း၊ ကမ်းနီးရေလုပ်ငန်းလုပ်ကွက်တွေမှာ နိုဝင်ဘာ ၂၈ ရက်နေ့က စ ပြီးတော့ အရှေ့ဘက်မှ လေပြင်းတိုက်ခတ်တာ တနာရီ မိုင် ၃၀ ခန့်အထိရှိနိုင်ပြီး လှိုင်းအမြင့် ၆ ပေ မှ ၇ ပေအထိ ရှိနိုင်ပါတယ်။

နိုဝင်ဘာ ၂၈ ရက်နဲ့ ဒီဇင်ဘာလဆန်းပိုင်းမှာတော့ မိုးလဲရွာလာနိုင်မဲ့အခြေအနေများရှိကြောင်းတွေ့ရပါတယ်။

မိုးရွာသွန်းနိုင်မည့်အခြေအနေ

ကုန်းတွင်းပိုင်းမှာမိုးရွာနိုင်မဲ့အခြေအနေတော့အလွန်နည်းပါးတာတွေ့ရပြီး ရှမ်းပြည်နယ်တောင်ပိုင်း၊ အရှေ့ပိုင်းနဲ့ တနင်္သာရီတိုင်းတောင်ပိုင်းဒေသအချို့မှာသာ မိုးရွာနိုင်ပြီး တနင်္သာရီတိုင်တောင်ပိုင်း မြိတ်မြို့အောက်ဘက်ဒေသတွေမှာတော့ မိုးများနိုင်ကြောင်းတွေ့ရပါတယ်။

တနင်္သာရီတိုင်းတောင်ပိုင်းအစွန် ကော့သောင်းမြို့မှာ နိုဝင်ဘာလ ၂၆ ရက်၊ ၂၇ ရက်နဲ့ ၂၈ ရက်တွေမှာ မိုးရေချိန် ၁၄၅ မီလီမီတာအထိ ရွာသွန်းနိုင်ပြီး မိုးအလွန်များနိုင်ကြောင်း၊ လေတိုက်နှုန်း တနာရီ ၁၅ မိုင်မှ မိုင် ၃၀ အထိ ရှိနိုင်ကြောင်းတွေ့ရပါတယ်။

………

မိုးလေဝသပညာရှင် ဦးဝင်းနိုင်ရဲ့ ခန်းမှန်းချက်တွေကို ဖော်ပြခြင်း ဖြစ်ပါတယ်။