ရေရှားပါးမှုပြဿနာကို ရင်ဆိုင်ကြရပြီ

နွေကို ပီပီပြင်ပြင်မရောက်သေးခင်မှာပင် ရေရှားပါးမှုပြဿနာကို အချို့နေရာဒေသတွေမှာ ရင်ဆိုင်နေကြရပြီဖြစ်သည်။ သဘာဝပတ်ဝန်းကျင် အစဉ်အဆက် ပျက်ယွင်းခဲ့သည့်ကြားက တိုင်းပြည်အခြေအနေကမောက်ကအခြေအနေမှာပင် ရေရှားပါးမှုပြဿနာနှင့်အတု ပြည်သူတွေမှာ ဒုက္ခမျိုးစုံကိုရင်ဆိုင်ကြရ‌တော့မည် ဖြစ်သည်။

ရေရှားပါးမှုပြဿနာကို ရင်ဆိုင်နေကြရခြင်း၏ အဓိကအကြောင်းအရင်းတွေထဲမှာ နေရာရွှေ့ပြောင်းနေထိုင်ကြရခြင်းသည်လည်းအကြောင်းတရားတစ်ခုဖြစ်လာပါသည်။ ပြည်သူတွေသည် မိမိတို့ တည်ဆောက်ထားခဲ့သော၊ ရှိပြီးသော ရေအရင်းအမြစ်တွေကို စွန့်ခွာရသောအခါ နွေရာသီတွင် ရေအလွယ်တကူရရှိဖို့ မလွယ်တော့ပါ။

” အဓိကကတော့ ချောင်းတွေ၊ မြောင်းတွေကို ဆည်ပိတ်ပြီးသုံးကြရတာ။ နွေရာသီရေကမလာတော့ ရေနည်းလာတယ်။ ရေက သန့်ရှင်းမှုမရှိတော့ဘူး” လို့ မကွေးတိုင်းအတွင်းက ပြည်သူတစ်ဦးက တွေ့ကြုံနေရသည်ကို ပြောပြသည်။

ဟိုအရင်ခေတ်က တောထဲတွင် တောင်ယာလုပ်ရင်းနေထိုင်သူတွေသည်သောက်သုံးရေအတွက် ချောင်းနံဘေးတွင် စမ်းရေတွင်းတွေတူးပြီး သောက်သုံးရေကို ဖြေရှင်းခဲ့ကြသည်။ နောက်ပိုင်းနှစ်များတွင်တော့ ချောင်းဘေးနားကမြေအောက်ရေသည် နွေရာသီတစ်ရာသီလုံးအတွက် မလုံလောက်တော့ပါ။

” ရေကသဲပြင်အောက်မှာ မိုးတုန်းက စုကျန်နေခဲ့တဲ့ ဝပ်ရေလေးပဲလေ။ အရင်တုန်းကလို စိမ့်ထွက်နေတဲ့ရေမဟုတ်တော့ဘူး။ ဒီတော့ တူးလိုက်ရင်လည်း ရေတွေ့ပေမယ့် ခဏလေးခမ်းသွားတာ” လို့ ရေရှားပါးမှုအတွက် ကြိုတင်ဖြေရှင်းဖို့ ကြိုးစားနေသူတစ်ဦးကပြောသည်။

” ရေအသက်တစ်မနက်” ဆိုသောစကားရှိပါသည်။ ခု ၂၀၂၄ ခုနှစ်သည် အပူဆုံးနှစ်ထဲမှာပါနေသည်ဟု သဘာဝပတ်ဝန်းကျင်နှင့် မိုးလေဝသပညာရှင်တို့ကဆိုထားသည်။ ထို့ကြောင့် မြန်မာနိုင်ငငံအလယ်ပိုင်းတွင်သာမက အီကွေတာနဲ့ နီးသည့် ဒေသတွေမှာလည်း ရေရှားပါးမှု မကြုံတွေ့ဘူးဟုမပြောနိုင်ပါ။

ယခုနှစ်အတွင်း ဧပြီလသည် အပူဆုံးလဖြစ်မည်ဟု ပညာရှင်တို့ကဆိုထားသည့်အတွက် ရေရှားပါးမှုပြသနာလည်း အဆိုးဆုံးရင်ဆိုင်ရမည့် လဖြစ်သည်ဟုဆိုနိုင်ပါသည်။ ထို့ကြောင့် ရင်ဆိုင်ရမည့် ကျန်းမာရေးပြဿနာတွေအတွက် အသိပညာရှိသူတွေ၊ ဦးဆောင်သူတွေအနေနဲ့ မည်ကဲ့သို့ပြုမူနေထိုင်ကာ ဖြတ်သန်းကြရမည်ကို လေးလေးနက်နက်ကြိုတင်စဉ်းစားထားကြရမည်ဖြစ်ပါသည်။

တက်နေထွန်း