အဖေ့အိမ် သို့ အလွမ်း
အဖေနေခဲ့ဖူး၍အဖေ့အိမ်ဟု ရေးမိပေမယ့် အဖေရော ကျွန်မတို့ရော ထိုအိမ်က ထွက်ခွာလာခဲ့သည်က ကြာချေပြီ။အဖေတို့မှာမောင်နှမတွေအများကြီးရှိသည်။ထိုမောင်နှမတွေက မွေးထားသော သားသမီး မြေး မြစ်တွေက လည်း များပါသည်။ အဖေသည် ထိုအိမ်က ထွက်လာပြီးနောက်ပိုင်း လယ်လုပ်ချိန်၊ကိုင်းလုပ်ချိန်ဆိုလျှင်တော့ မိဘ အိမ်ပြန်ပြီး ကူညီတတ်သည်။အဖေ ထိုအိမ်ပြန်သွားချိန် ၊ ကျွန်မ ကျောင်းပိတ်ရက်များနှင့် တိုက်ဆိုင်လျှင်တော့ ကျွန်မ သည် အဖေ့ ထံလိုက်သွားတတ်သည်။ တစ်ခါတရံ နှစ်ထပ်သင်္ဘောလေးနှင့်၊ တစ်ခါတရံ မော်တော်ဘုတ်လေး နှင့် ကျွန်မ သည် လူကြုံ အမျိုးများဖြင့် လိုက်သွားတတ်သည်။ အဖေတို့အိမ်ရှေ့မှာ ရေထည့်သည့် အုတ်ကန်အကြီးကြီးရှိသည်။အုတ်ကန်ဘေးမှာ အိမ်ကို ပတ်ပြီး ကွန်ကရစ် ရေမြောင်း တွေဖော်ထားသည်။အဖိုးနှင့်အဖွားကလည်း လယ်ဧကတွေများစွာပိုင်ဆိုင်ပြီး ချမ်းသာကြွယ်ဝပါသည်။အိမ်ကတော့ ရိုးရိုးနှစ်ထပ် ပျဥ်ထောင် အိမ်ပင်ဖြစ်သည်။ အိမ်နောက်မှာ စပါးစေ့ ၊ […]